Kopointutunan

Apasi Boros, Apasi Tinaru

Boros Kadazandusun nopo nga boros di pinotungkus do komolohingan di laid kumaa dotokou. Boros Kadazandusun diti nogi nga boros sandad do tinaru Kadazan Dusun di gunoon soira mogibooboros toi mogiroromut kumaa tiso om tiso. Baino nopo di, okuri no sukod wagu di koilo mimboros boros sandad diti. Mantad dilo do mositi do gompion o boros diti mooi do au orulun tumanud do timpu mamanau..😍😍😍

Suai ko ii, boros nogi diti nga kopointutunan om impohon id piromutan montok toinsanan tinaru. Ingkaa nogi tinaru Kadazandusun tu haro boros do tinaru sondii. Boros Kadazandusun nopo nga kointutunan toi ko’ identiti montok do tinaru Kadazandusun. Ii no pogi nung atagak nopo boros nga atagak no o tinaru. Mantad dilo, oponsol kopio tamangan, potindohoyon om poburuon o boros Kadazandusun mooi do au atagak.

Sumusuhut, montok do popoburu om manamong boros tina tinaru kadazandusun diti, haro piipiro laang i nowonsoi miagal do Boros Kadazandusun nopo diti nga tinimpuunan id piipiro sikul tosiriba di nopili sabaagi projek perintis pongiaan om pambalajalan Boros Kadazandusun. Kurikulum Bersepadu Boros kadazandusun id sikul tosiriba nopo nga mooi do kaanu ngawi i tangaanak sikul do minsingilo om monginobos kabaalan mimboros om kaanu do toilaan om kaanu do mongimuri do boros tinaru sondii.

Montok kopoilaan kumaa toinsanan, Boros Kadazandusun nopo diti nga iso suku tinaru di bobos agayo id pogun Sabah. Mantad dilo, ogumu o dialek id suang Boros kadazandusun. Sundung po do haro pisuayan dialek nga kaakal po do id suang rumpun suku tinaru Kadazandusun. Mantad no ngawi dilo, soira haro nodii ponontudukan Boros kadazandusun id sikul tosiriba, sikul takawas, om nogi id taang loobi takawas miagal do id UPSI om IPG, alansan do koburu om kotilombus nodaa boros diti kumaa oinsanan sukod wagu tinaru kadazandusun.

Sundung do ingkaa, kosingilaan om katampasi boros tinaru nopo nga mantad no do gunoon do sanganu (somboros) do moboros. Boros tinaru di au gunoon (boroson) au atampasi id winorun diti. Katagakon do boros kopogowit kapatayon (kopunsoon) do tinaru dino. Iso ralan tapantang tulun momogun do manampasi boros tina iri no tu mogiboboros yolo id boros tinaru tumimpuun id walai sondiri kumaa tanganak, id piombolutan, id pitimungan, id dumo porobuaton, id walai panambayangan, id linaging podsindingan, id gana pongindopuan, id pitatabangan, id kapangaramayan do tadau kaamatan, id kapanaandakan kinouliton tadau kinosusuon, id koponguludan do abaabayan tadau piangayan, om ogumu po kaantakan om koyonon susuai.

😊 Kotoluadan om kounsikahan 😊